أوراس نغ

ئثري ئقظلن (النجم الآقل)

الباحث والمؤلف والمهتم باللغة والتراث الامازيغي "اسماعيل عقون"

في ذكرى رحيل المناضل “عمار نقادي”

ITRI IGEDLEN

Awras yenniri f yetri igedlen

Ami qqaren âemmar Cawi

Yessigher iwaman ur yettwawi

Mmigh netta d amedya deg ulawi

Awras yenniri f yetri igedlen

Yellan f tmagit d arezzaw

Achal yella yeska agraw

Di Fransa netta d wuma-s Azwaw

Besseââud yegrin tizaw

Awras yenniri f yetri igedlen

Kuz n temrawin d nnetta d ameghnas

Ur idadi ur yeggwid wemnay aterras

Ay yessilin addur n wawras

Awras yenniri f yetri igedlen

Iêemmelen tamurt-nnes

Irezzu f izuran d umezruy-nnes

Ur yettu cca laked d tmagit-nnes

Awras yenniri f yetri igedlen

Yeskan agraw imazighen

Yeggur ur as-âriqen yebriden

Ussan izeghlen d yidan isemmiden

Awras yenniri f yetri igedlen

Wayyi d annaz-–nnegh ageswah

Uress awelli d ila-nne$ afewwah

Achal yemmut-anegh wa ay yeqqaren: ARAHH

Awras yenniri f yetri igedlen

Ay yennan ur nelli d aâraben ur nelli d irumiyen

Ur nettenfil d Imazighen qqaren-anegh Icawiyen

Amezruy yutlay fella-negh nella zdat imesriyen

Awras yenniri f yetri igedlen

Argaz ameqqran amzul

Yetcaten f izerfan d wazzul

Ur yerwil ur yelli d bab uhedlul

Awras yenniri f yetri igedlen

Yeqqaren tmagit-nnegh d tifinagh

Ur aghen-ssaggwaden izeghwagh

D ilelliyen qqaren-anegh Imuzagh

Awras yenniri f yetri igedlen

Tevra-s am wexxam ami yudu uqendas

Tehwa-d tallast yuqqa wass

Yezzegret yid irekkeh d aseggwas

Awras yenniri f yetri igedlen

Imazghanen seg weqrurreh illen

Timira izulagh cerhen dessen

Achal rgen falla-s ur zzullen

Awras yenniri f yetri igedlen

Yedder gher irumiyen d amanag

Tamettant-nnes tedja-negh-d fagag

Imedwalen galfen-hen tsurag

Awras yenniri f yetri igedlen

Tgara useggwas zdat yennar

Ur as-yettmegnet ur at-yezzar

Ur ad t-ttmennad teslit n wenzar

Awras yenniri f yetri igedlen

Netta yezwa unetcni nettlagha

Tarca terg ur telli tsagha

Tamettant-nnes tedja-negh nettghagha

Awras yenniri f yetri igedlen

Anil-nnes deg wammas n Tmerwant

Izumal nbubbesen tafukt d taberkant

Gur yeghber tadeswin msant

Tigida d tersal Icawiyen ngugant

Ettes di ticli a âemmar timuzagh llant

Aked imazighen âerremen s tgawant!

Tayyi d tinigt nemmegh-tt d taghennant!

D Mazigh ur ay-yettgiyeb lekkan tamettant!

مقالات ذات صلة

زر الذهاب إلى الأعلى
إغلاق