مجتمع

سلسلة رمضان شهر اللهفة والقضيان… شوربة برعاية جومبو..

سلسلة رمضان شهر اللهفة والقضيان...

الحلقة الثانية

طلينا على السوق في أول يوم من رمضان وتعرفنا بالفاجعة… اللحوم نعمة ما تدوم واليوم بالذات أسعارها طالعة… الناس صايمة وأخرى من زمان مشتاقة وجايعة…تجيهم في شهر الرحمة وتحكم عليهم بالضربة الخادعة… المعيشة في نظر الزوالي صارت ضايعة … والجهات المستغلة للمناسبات مازالت في جيبو المثقوب والمنقوب طامعة… قليل مغبون الشمس ما كانت على بيتو طالعة… وشكاويه من كثرتها الجهات المسؤولية ما عادت بيها سامعة…  الدجاج لي كان مقصوص الجناح اليوم طار بشهادة من الجامعة… ولحم الخروف منو الخوف نساه من يوم كان في سن السابعة…. طارت النعمة ومعاها الرحمة بسبة جشع الناس لي ما هي شابعة… تاكل في لحم غيرها ملهوفة ما هي قانعة.

الجزار موثق عقد مع المرفه بين الميزان والباي… اللحم تحول إلى حلم وعلى الزوالي باي باي…في بلادي الفلاحة ناجحة على مستوى الأخبار والمعلومات تع الناس الهاي… قالك حققنا إنتاج وطني كبير ونقدرونصدرو عبر البر والبحر و”الفلاي”… اللحم كاين ومتوفر والمخزون يكفي الأبيض والأحمر والباباي… كلنا سواسية في نظر سيدي مولاي…. ولما تلحق لحظة الحقيقة وتفوح من بعيد ريحة الشواي… تغني المعدة ويشكي الراس وتبكي العين على لي جاي…. شعارات مضروبة والخطة ملعوبة جوعوه منو جاي…. باش ما يتحرك لبعيد ويبقى في الايد يسمع صوت الناي… يبقى على عهد الفقر ما يصلح يكون باشا ولا باي.

مالا الزوالي المسكين ما عليه غير يلعب لعبو..ويتقشف أكثر من لي كان يصلي ويدعي ربو… يرضى بالشي القليل ماعندو على من يعلن حربو… ما عندنا واش نقولو ولا على من نخبو…  بعد ما تنكرت ليه الظروف والدينار على وجهو كبو… اختار اخف الأضرار واهم الحلول ووسع قلبو… مالا الشوربة تاع عام السنة راهي برعاية “جومبو”.

نوارة بوبير

مقالات ذات صلة

زر الذهاب إلى الأعلى
إغلاق