أوراس نغ

قصص وقصائد أمازيغية: ءنزيلن ذي ثمورث – نغ

الباحث والمؤلف والمهتم باللغة والتراث الامازيغي "اسماعيل عقون"

D INZILEN DI TMURT-NNEGH

Izumal n teghdemt di teghmert n Wawras agujil ur hlin ur ttwerran gher wa ay

yehlan, aya mattaghef?

Seg wani-s nezra nesla mennawet n tutlayin ay yirekkhen d tihelsatin deg yimawen

imeqqranen laked imezzyanen, mmigh mda ad-usin yudan-nnegh ttgemmnen, ur

llin ca d imudan s tittut; achal gher-sen anghur di tmektayt mmek qqaren yya agher

ur llin wanghuren ur udinen, u weâsa ur tettemhirem si tizzegrett uherrar-aya ay

yellan ay yexs yezzegret-it d agilal. rekkhet zigh kitc gher uzwil tâezmem-t nezzeh at

ad tcaren yixfawen-nnun s yinezgam u ad teqqimem teswangamem am wa ur yufin

afsak itceqlalin yedder.

Tayyi d tadyant tedra iyidj seg yimazghanen n Wawras lulen-as-d senn n yineglas

yecreh yissen mmek tecreh tawya-nnes, layenni mmek qqaren Icawiyen n zik « islan

ur yewwiden tameddit » yenna u ammek yettili di tghara n yeghrifen ighermanen

ad yeâna taghiwant ay yellan aked nnettat d tanzilt di tmurt-nnes, degga yewwed

anettag ami qqaren « Lhala lmadaniya » yaf yidj icatat yeqqel-ihid ;yuâa-s-d s

tutlayt taâirit tunsibt di tmurt n yigujilen « wac tesheqq » yuâa-s umazghan : « lulen

gher-i senn n yineglas, xsegh ahen-seklesegh gher-wen deg useklas n tlalitin » u

min ad-iâin ixf-nnes negh at-ihebber yerfa-d fella-s : « ehder mâaya belâerbiya,

ana ma nefhemc ccawiya » aled dayyi mazghan ur yuc labas yeqqim winni

yettmermer yezzad ay yedjin yudan behren, yerni icata-t umazghan s wawal n rratt,

yenna-s: « ucay- d tirdit-nnek mlih trezmed imejjan-nnek, anetc usigh-d xsegh

ad skelsegh tarwa-inu » yetmada umaray yeswazzed gher uzmam adeg llan

yissaghen yettusumren « L´asma´a lmuqtaraha » yefdek-it yendeâ iderren

yesmedran di tsenwin, yenna-s umazghan : « ametcuk assagh-nnes KUSILA,

tametcukt NUMIDYA » yengerâ-ed fella-s umaray yeqqim yezzad yettaffag yettrus «

had lasami maâendnac mahumc ntaâ ljazayer » yuâa-s umazghan taweââit n

umdan agherman ur yelli cc am usuni : « katya, cirihan, linda, sabrina….wail

âebdelmuttaleb.. D ittzayriyen » yemduqqes-d fella-s umaray : « maâendnac ruh

leblad leqbayel usejjel temma ulattek » yeqqel umazghan ilawa yesseghli-tt d alili,

yufa iman-nnes had imunes id-s ur yettawwad aked trugi, yeswingem bzayda yezra

maray-ayyi ur iferrez « alif» si teghrit mmek qqaren Icawiyen n zik.

Yerg ssi-din yiga timehwelt-nnes d taghdemt negh mmek qqaren taddart izerfan,

yudef gher umaris yejjedda s wa at-yeblan iferreh u imara ad iferreh nezzeh, u netta

mmigh di tirdit-nnes yudan n teghdemt ay yessenen azruf negh ajmu.

Teqqim mmek ggamen mmek tettegbir tluft-nnes,bessemara aldegga zrin krad (03)n

iseggwasen ma yefra-tt, lulen-d tarwa-nnes tikelt tiss sent aghella n wasen-tedra am

tghiwant-nnsen ur yucen d tanzilt deg Wawras agujil, achal tella di-s tgemmi n

tkilsa « itcel » tsess si titt n waman yiziden am tkilsa, layenni tutlayt taâirit tuâa-tt «

âin ttuta » ssi-din a tuqqa tkilsa si teghmert-dinn, seg wani-s tit-nnes teqqur tenniri

degga tettusqummet, teqqar iyisuta: « tkilsa negh itcel, ur ttenfilen ur ttilin d

(ttuta) … ! » Tayyi d tabradt iwa iâezzmen amezruy d wa ur iâezzemen, iyya

yettfen deg ughur-nnsen d yya yennesren…Nettsittim (nessaram) ass seg

wussan, ur nettili cca d inzilen di tmurt-nnegh.

Tadyant-aya d talya, tedra di teghmert n Wawras agujil!

زر الذهاب إلى الأعلى
إغلاق