أوراس نغ

قصص وقصائد أمازيغية:MOZARABE

الباحث والمؤلف والمهتم باللغة والتراث الامازيغي "اسماعيل عقون"

Llan idudan-nnsen ttmelqafen, imara ad ahen-d-yenter, layenni min tadmalt, tghawsa tenter-it

gher-s, tecbeh-it acbah am udkir…

Matta tizaged…iluqq-a ur tewwivded ca mraw…Yerrebza id n yiman-nnes, seg wani-s yettu ad

yessiden, yerni tahurt, imara ad yesrem idudan-nnes s uselles, temâes-ihen nezzeh, yessehza s

tezghel trenni di tfekka-nnes…a tehla waya n tnala, ad tinid di turtut yettetriyak… ticli tict ur

yelli yetthejhej iss… tahurt tict yettmara ad yesrem idudan-nnes idebâen, twaghitt…aglaf i

urzu…ad tefdek tittawin, ad tetlessen di texdusit.

-Awelli a tettud asiden (tiddant).

-Arahh sers dad-nnem luqq-a…

-Hih…annaz-inu yehla yif annaz-nnek…arcal yettawi-d imal yennummer… (Werni

tsusmi) tenna: Tawesremt-inu telqef, anetc ttusmucegh had reclegh deg unebdu,

qqaren asli mmi-s n yudan gher-s agerdas d yimenbi, min uttug tumert ayes jjigh

tawesremt-inu ad t-tessegli…

-D alyaw (izref) a teqqared, tezrid c anemmuc-nnem zik.

-Zrigh-t ass n yimucan d aydin, d lgherz (hudri) d azusay d imetriyes, nnan ur isess

c anzir, yettzalla…

Ttura ad s-yeddemmem, ur tettnekkar c adetca-idin mammek a teqqar yuma-tt ad terni ass yidj f

udrusi ssyaled ad yeggawen nezzeh amnadi-nnes, ad yeggawen seg yiherraren-nnes imiziden…

âerrment zdat-s, marant ad adfent udunt… at them-nnsent, layenni nettat tqum ad taf axellas

(tnast) min andebbi negh lekkan afaci, ihirjan-nnes yesruh-ihen ekw, ur yiqum ad yig aked qli,

tghawsa ekw yessegraw-itt, tittawin, ticenfirin, idudan-nnes, yerrefref (ihaf) yenxa yefsi am

tdeqqist.

Ur as-yeqqim lekkan aydin ukutti, aya yella, yekla yesselmay-itt, yezzad am war, yettmara ad

ibucek yidini yeccerghaten…yessigh ighallen ad yesqillet iri-nnes amellal ad yadu s tsudint atyedjin deg uswazzed yenkes.

(Rwel fella-s a ur terghed… acekk d makar… tettakred adeg ur ak-yelli ulyaw [izref]…att deg

usun-nnek. Yenqems gher deffer, ighucc aghucci d azewwar d yimwettegh wurzu, tukez nettat d

axerwid ad tmara ad tesselm, tmermer tettetmezgar.

-Tazugayt tettefniz-ak… Zdat n wa had tedj tkamert, tenna: qli n wass ak-d-nkigh

taktut-inu d tiffugna nezzeh s yimedruyen d tsemhirin, seklesegh di-s tikli-inu

tanimant si temzi, weâsa ad tessened ihejhijen-inu ekw ttfewwren, hettefegh ad

lemdegh u ad awigh agerdas yenban, hafegh, hettefegh ad arigh idlisen, ad rekkhegh

d tasegmayt hafegh laked.

Hettefegh ad newwlegh yidj seg waya n yinemrayen imxumeen, layenni aydin ur

yedri, si temzi d nnetc tthejhejehegh s tmussni d unkas, layenni ddregh d tanezfurt

jar n yefsilen (imura), u had ddregh amm-idin, had qedhegh u ay-d-yessusef (ay-dyerr) uttaw, weâsa ad tessned f unemmuc-inu tighawsiwin âerrment, ad herregh

(mciwregh) id-k, ur yelli d talya (tidett) lekkan tzallitt yettzalla, ur isess anzir…

tekker tedj-it di ca n thendirt, ur as-yizid aked qli, werni uzway-nnes yemduqqes f

yemma-s.

Seg wass-a ur sâeddayegh aked itqiyart(tiziwt) ad d-tadef asun-inu (axxam).

زر الذهاب إلى الأعلى
إغلاق