مجتمع

 ملهوفين… على المّاعيين

سلسلة رمضان شهر اللهفة والقضيان

الحلقة الخامسة

مرت خمس أيام من حلول الشهر الكريم… مبانش الكرم في ناسو وين… تخرج للسوق تشعر انك واقف على يوم الدين… ناس تتصارع لأتفه الاسباب تحكي معاها تصبح من المذنبين…  معارك في كل حومة وصراعات بالشر محمومة والضعيف مالقا بيها وين… والحِلم عندهم ذلة ناسيين تعليمات الخالق ونبي المرسلين… كل سبة وليها عراكها على الشر الناس مسابين.. ما عليك غير تجبد روحك وتكتفي تكون من المشاهدين… ولو أنهم المشاهدين يتحاسبو حتى على شوفة العين… مالا خلي نحكيلك على حرب النساء خارج الكوزينة لما يكونو مسوقين.. هنا تبقى حاير بلا راس وخاصة إذا كانت السبة لماعين.. ما زالهم يشريو وعلى هذي السلعة ملهوفين… وكأنو البيت فارغ وما لقاو فاه ماكلين.

صراع طويل وعريض في محل الأواني… وتاجر المحل راه في وسط الحريم يعاني… كل وحدة شادة في السارفيس وتفتعل المشاكل بالعاني… على أساس هذا هو الساس لي يزهي الكوزينة وينقص لمحاني… ويا ويلك لو حاولت تخفف من الشر لي راه يقطر من الكلام والملام والمعاني… “على كوزينتي نخلي عرشي” صار شعار هو ثاني… الديكور هو الأساس ما تحاول تقنعهم بشي ثاني… الكل متفق على انه مجرد صراع تافه على وسخ الدنيا والفاني… لكن في قلب الحدث الواقع شي ثاني … الفتنة شاعلة من بعيد وزيد يا بوزيد خليك بعيد عيناني… اعمل نفسك خارج المجال وأبقى ساكت على المحال ظاهر عمياني.. وإلا راح نطيحو في المعمعة ونخسرو أسنانك وأسناني.

في الفايسبوك وبين المجموعات رافعين شعارات مثالية… الصبر والاحتساب والقناعة تكفي هذي هي العقلية… زوجي قرة عيني وحماتي حياتي وإيماني نور عينيا.. ولما تسمع بتخفيضات على الأواني المنزلية… راح تلقاههميتهافتو بصورة خيالية… نفسي نفسي والبقاء للأقوى مخليين كل أشغالنا ومتراكمين في المحلات الشمالية.. الغضب سيد الموقف والعاصفة خلقتها الأنانية… في هذا المكان بالذات ما بقاش الناس ملاح والنية… تتبسم وتسلم عليك الدعوة مخلية… يعفسو فيك وعينك تشوف ما تنفعك العقلانية…  تكشر وعلى ذراعك تشمر تكون حاجتك مقضية..

نوارة بوبير

مقالات ذات صلة

زر الذهاب إلى الأعلى
إغلاق